Concordia Capital Park - Nuwe Generasie

Ons is geseënd in Capital Park om tussen mense te wees met geweldige talente, mense met baie verhale, ouer mense met ontelbare ervarings en met elkeen van ons gebeur allerhande interressante dinge deur die week. Maar ons weet so min van mekaar. Een moontlike rede hiervoor is dat ons mekaar (meestal) net op 'n Sondag sien en nie veel kontak deur die week het nie.

Daar word al lank reeds gepraat oor 'n gemeenteblad. Maar, soos dit nou eenmaal is, is die ous met die idees nie noodwendig die ous wat iets daaraan gaan doen nie . Hier is die goeie nuus: Pieter het homself bereid verklaar om te help om die gemeenteblad af te skop. Ekself is bereid om my deel te doen en onder andere seker te maak dat die blad op die webwerf ook verskyn.

Idees is daar baie. Dus, sonder om snaaks te probeer wees, soek ons nie na idees nie, maar mense wat sal bydra tot die gemeenteblad, al is dit iets klein, want met baie bietjies kan ons iets ordentliks doen. Hier is dus 'n uitnodiging vir almal wat op een of ander manier wil deel word van hierdie geskiedkundige gebeurtenis in ons gemeente - kontak my of Pieter en maak 'n verskil in iemand se lewe.

Ons sien daarna uit om van julle te hoor.

Kobus

Die eerste uitgawe van die gemeenteblad is uiteindelik gedruk en word tans deur wyksleiers versprei. Die inhoud is ook beskikbaar as 'n artikel op die webwerf onder "Artikels". Die volgende uitgawe word reeds beplan en ons is op soek na nuuswaardighede. Skryf asseblief iets - lank of kort - maak nie saak nie. Of vertel ons wat jou evaring van die pas afgelope Lentemark was - was dit 'n goeie idee, was dit suksesvol? Wat van die kinders? Was daar genoeg van die regte dinge om hulle besig te hou?

Of skryf vir ons wat julle dink oor die kerklike opvoeding van die jongmense vandag - die Sondagskool. Is daar nog plek daarvoor in ons moderne samelewing en in watter formaat? Enige idees? Wat van jou ervaring van die nuwe "gees" of opwinding in die gemeente - het jy agtergekom dat iets verander het in die laaste tyd? Of skryf vir ons iets oor een of ander aksie waarby jy betrokke is, of graag sou wou wees. Of laat weet wat jy dink van die gemeenteblad - onthou ons soek nog na 'n naam - ons het reeds terugvoer gekry en nuwe idees vir die volgende uitgawe, maar daar is plek vir nog idees.

Ons sien baie daarna uit om van almal te hoor. Skryf vir my hier of stuur 'n e-pos na coetser.kobus@gmail.com. 'n Ander opsie is om iets met die hand te skryf en in die kerk in te gee (merk dit duidelik vir my aandag).